“Sağlam Mühit – Sağlam Gələcək” layihəsi çərçivəsində məktəblilər üçün növbəti cizgi filmi “WASH” (su-sanitariya-gigiyena) mövzusunda hazırlanıb. Animasiya filmi qlobal dayanıqlı inkişaf məqsədlərindən altıncısı olan “Təmiz su və sanitariya” mövzusu üzərində qurularaq, sanitariya və gigiyena barəsində məlumatların təhsilalanlara vizual şəkildə çatdırılması və təbliğindən bəhs edir. Mövzunun seçilməsində əsas məqsəd tükənən resursların məişətdə davamlı istifadəsinin düzgün istiqamətləndirilməsi ilə su qaynaqlarının dayanıqlı idarə olunduğu əlverişli mühitin yaradılmasına töhfə vermək, həmçinin əllərin yuyulması ilə patogenlərin, xüsusilə COVID-19 virusu daxil olmaqla infeksiyaların qarşısının alınması prosesində təhsilalanlar arasında davranış dəyişikliyinə nail olmaqdır.   Qeyd edək ki, sözügedən layihə 2016-2020-ci illər üçün Azərbaycan Hökuməti və UNICEF arasında imzalanmış Əməkdaşlıq Proqramı çərçivəsində 2018-2019-cu illər üçün Təhsil proqramı - Dövri Fəaliyyət Planının “Azərbaycanın seçilmiş məktəblərində məktəb əsaslı təlim proqramı vasitəsilə ekoloji maarifləndirmə üzrə bacarıqların gücləndirilməsi” bəndi üzrə artıq dörd ildir ki davam edən silsilə layihələrdən biri kimi icra edilir. Layihənin əsas məqsədi cəmiyyətdə dayanıqlı inkişaf məqsədləri üzrə məlumatlılığın artırılması, ekoloji mədəniyyətin, həmçinin məişətdə iqlim dəyişmələrinin qarşısının alınması üçün davranış tərzinin formalaşdırılmasıdır. Layihə çərçivəsində dayanıqlı inkişaf məqsədlərinin təbliği mövzusunda daha bir öyrədici animasiya filminin, həmçinin kiçik yaşlı məktəblilər üçün maarifləndirici video oyun tətbiqinin hazırlanması planlaşdırılıb.  

21/01/2021 11:24

“Təhsildə inkişaf və innovasiyalar üzrə” IV qrant müsabiqəsi çərçivəsində qalib gələn layihələrin icrası uğurla davam etdirilir. 2017-ci ildən həyata keçirilən müsabiqənin əsas məqsədi təhsil müəssisələrində və təhsilverənlərdə sağlam rəqabəti, innovativ fəaliyyəti stimullaşdırmaqdan ibarətdir.    “Təhsildə inkişaf və innovasiyalar üzrə” IV qrant müsabiqəsi çərçivəsində 648-i “Fərdi layihələr”, 204-ü “Ümumi təhsil müəssisələri” kateqoriyası üzrə olmaqla, ümumilikdə 852 layihə təqdim edilib. Təqdim edilən layihələrdən “Fərdi layihələr” üzrə 136, “Ümumi təhsil müəssisələri” kateqoriyası üzrə 47 layihə qalib olub və onların bir qisminin icrası ötən il tamamlanıb. Hazırda qalib layihələrdən “Fərdi layihələr” üzrə 84, “Ümumi təhsil müəssisələri” kateqoriyası üzrə 32 layihənin icrası uğurla davam etdirilir. Qeyd edək ki, “Təhsildə inkişaf və innovasiyalar üzrə” IV qrant müsabiqəsi çərçivəsindəki layihələrin təmsil etdiyi şəhər və rayonların ilk onluğuna Bakı, Gəncə, Sumqayıt, Abşeron, Astara, Balakən, Biləsuvar, Cəlilabad, Quba və İsmayıllı daxildir. Qalib layihələrin məzmunu, fəaliyyətinin təşkili və layihə rəhbərlərinin öhdəlikləri pandemiya şəraitinə uyğun olaraq onlayn icra üçün uyğunlaşdırılıb. Lakin 44 gün ərzində davam edən Vətən müharibəsi ilə əlaqədar ölkə ərazisində distant təhsil üçün nəzərdə tutulan proqramların istifadəsi məhdudlaşdırıldığından, eyni zamanda Nazirlər Kabinetinin müvafiq qərarına əsasən təhsil müəssisələrində tətil elan edildiyindən qrant layihələrin müqavilə üzrə planlaşdırılan icra qrafiki ilə müqayisədə müəyyən fasilələlər yaranıb. Buna görə də müqavilənin müvafiq bəndinə istinadən qalib layihələrin başa çatma müddəti uzadılıb. Təhsildə inkişaf və innovasiyalar üzrə keçirilən bütün qrant müsabiqələri ilə https://www.grants.edu.az/ saytı vasitəsilə tanış olmaq mümkündür.

21/01/2021 09:34

"Mədəniyyət" və "ARB Günəş" telekanallarında yayımlanan “Dərs vaxtı” proqramının yanvarın 21-i üçün nəzərdə tutulan cədvəlini təqdim edirik. Təhsil Nazirliyi dərs cədvəlinə diqqət etməyi, dərsi “Dərs vaxtı”nda öyrənməyi tövsiyə edir. Əziz şagirdlər, unutmayın ki, teledərslər ən yaxşılardan öyrənmək üçün əlavə və unikal imkandır. Qeyd edək ki, “Dərs vaxtı”na ekran qarşısında baxa bilməyənlər keçirilmiş dərsləri Təhsil Nazirliyinin rəsmi "Youtube" kanalı ilə yanaşı, "Dərs vaxtı"nın "Facebook" səhifəsindən (https://www.facebook.com/dersvaxti.edu.az/), eyni zamanda videodərslər portalından (https://video.edu.az/) izləmək imkanı əldə edə bilərlər.

21/01/2021 08:39

Təhsil Nazirliyi tabeliyində fəaliyyət göstərən uşaq-gənclər inkişaf mərkəzləri 20 Yanvar faciəsinin otuz birinci ildönümü ilə əlaqədar “dəyirmi masa”lar təşkil edib. Tədbirlərdə vətən yolunda canlarından keçən şəhidlərin ruhu bir dəqiqəlik sükutla yad edilib. Onlayn keçirilən “dəyirmi masa”larda uşaqlara xalqın milli azadlığı, müstəqilliyi uğrunda Azərbaycanın tarixinə qəhrəmanlıq səhifəsi kimi daxil olmuş 20 Yanvar hadisələri barədə geniş məlumat verilib. Tədbirlərdə Ulu öndər Heydər Əliyevin yolunu uğurla davam etdirən Prezident İlham Əliyevin rəhbərliyi ilə şəhidlərin xatirəsinin uca tutulmasından və şəhid ailələrinə göstərilən xüsusi diqqətdən bəhs olunub. Dərnək üzvlərinin ifasında şəhidlərin xatirəsinə həsr olunmuş şeirlər səsləndirilib.

20/01/2021 16:39

Xüsusi karantin rejimi dövründə Azərbaycan Respublikasında fəaliyyət göstərən ümumi təhsil müəssisələrində tədris və təlim-tərbiyə prosesinin distant (məsafədən) formada təşkilinə dair Təhsil Nazirliyi Kollegiyasının qərarı ilə “Xüsusi karantin rejimi dövründə ümumi təhsil pilləsində təhsilalanların attestasiyasının (məktəbdaxili qiymətləndirmənin) aparılmasının müvəqqəti Qaydası” təsdiq edilib. Qayda xüsusi karantin rejimi dövründə ümumi təhsil müəssisələrində tədris və təlim-tərbiyə prosesinin distant (məsafədən) formada təşkili müddətində summativ qiymətləndirmənin aparılması və yarımillik qiymətlərin hesablanması məsələlərini tənzimləyir. Qaydaya əsasən II-XI siniflərdə bütün fənlər üzrə summativ qiymətləndirmə fənni tədris edən müəllim tərəfindən distant formada yarımilin sonunda bir dəfə olmaqla aparılır. Summativ qiymətləndirmənin nəticələri 100 ballıq şkala ilə ölçülür və qiymətləndirmədə test, inşa, çalışma, şifahi sorğu, yaradıcılıq və əl işləri, layihə kimi vasitələrdən istifadə olunur. 45-60 dəqiqə ərzində təşkil olunan summativ qiymətləndirmə nəticəsində müəyyən edilmiş ballar şagirdlərin yarımillik balları və qiymətləri hesab olunur və sinif jurnalında müvafiq qaydada yazılır. Qaydaya görə, üzrsüz səbəbdən summativ qiymətləndirmədə iştirak etməyən təhsilalanın həmin qiymətləndirmələr üzrə balı “0” qəbul olunur. Təhsilalan summativ qiymətləndirmədə üzrlü səbəbdən (xəstəlik (tibbi arayış təqdim edildikdə), bədbəxt və fövqəladə hadisə, sürətli internet bağlantısı və ya internetə çıxışı olmadıqda, texniki imkanları məhdud olduqda) iştirak edə bilmədikdə, müvafiq qiymətləndirmə günündən sonra növbəti 1 (bir) ay müddətində onun üçün summativ qiymətləndirmə təşkil edilir. Sürətli internet bağlantısı və ya internetə çıxışı olmaması səbəbindən şagirdin qiymətləndirmədə iştirak edə bilməməsi halında təhsil müəssisəsi tərəfindən qanunvericilikdə müəyyən edilmiş tələblər gözlənilməklə şagirdin əyani formada qiymətləndirmədə iştirakı üçün müvafiq şərait yaradılması təmin olunur. Qeyd olunan müddətdə təhsilalan qiymətləndirmədə hər hansı səbəbdən iştirak etmədikdə qiymətləndirmə üzrə balı “0” qəbul olunur. Sürətli internet bağlantısı və ya internetə çıxışı olmaması səbəbindən şagirdin qiymətləndirmədə iştirak edə bilməməsi halında təhsil müəssisəsi tərəfindən şagirdin əyani formada qiymətləndirmədə iştirakı “İmtahanlar zamanı koronavirus infeksiyasının (COVİD-19) profilaktikasına dair metodiki göstərişlər” nəzərə alınaraq təmin olunmalıdır. Distant formada summativ qiymətləndirmənin təşkili zamanı Microsoft Teams ilə yanaşı, Zoom, Whatsapp, Skype və s. digər elektron tətbiqlərdən istifadə oluna bilər. 2020-2021-ci tədris ilinin II yarımilində tədrisin və təlim-tərbiyənin distant (məsafədən) və ya əyani formada təşkil olunmasından asılı olmayaraq, diaqnostik və formativ qiymətləndirmələr də təşkil olunmalıdır. “Xüsusi karantin rejimi dövründə ümumi təhsil pilləsində təhsilalanların attestasiyasının (məktəbdaxili qiymətləndirmənin) aparılmasının müvəqqəti Qaydası” xüsusi karantin rejimi dövründə ümumi təhsil müəssisələrində tədris və təlim-tərbiyə prosesinin distant (məsafədən) formada təşkili müddətində qüvvədədir.

20/01/2021 12:11

Təhsil Nazirliyi 3 nömrəli Uşaq-Gənclər İnkişaf Mərkəzi 20 Yanvar faciəsinin otuz birinci ildönümü ilə əlaqədar "Biz sizə borcluyuq, igid şəhidlər!" adlı virtual sərgi təşkil edib. Məqsəd xalqımızın azadlığı uğrunda canlarını qurban vermiş Vətən övladlarının əziz xatirəsini yad etmək, şərəf və qəhrəmanlıq səhifəsi kimi tarixə yazılan bu günü uşaq və gənclərə aşılamaqdan ibarət olub. Mərkəzin yetirmələrinin hazırladıqları 30-a yaxın rəsm işi Azərbaycan tar ifaçılıq məktəbinin gənc və istedadlı nümayəndəsi, əməkdar artist Şəhriyar İmanovun ifa etdiyi "Nəbz" adlı musiqinin müşayiəti ilə sosial şəbəkələr vasitəsilə yayımlanıb. Uşaqlar öz rəsmləri vasitəsilə Azərbaycanın azadlığı, müstəqilliyi yolunda canlarından keçən şəhidlərimizə olan dərin hörmət və ehtiramlarını ifadə edib, müstəqil ölkənin övladları kimi onlara borclu olduqlarını bildiriblər.                

20/01/2021 10:10

"Mədəniyyət" və "ARB Günəş" telekanallarında yayımlanan “Dərs vaxtı” proqramının yanvarın 20-si üçün nəzərdə tutulan cədvəlini təqdim edirik. Təhsil Nazirliyi dərs cədvəlinə diqqət etməyi, dərsi “Dərs vaxtı”nda öyrənməyi tövsiyə edir. Əziz şagirdlər, unutmayın ki, teledərslər ən yaxşılardan öyrənmək üçün əlavə və unikal imkandır. Qeyd edək ki, “Dərs vaxtı”na ekran qarşısında baxa bilməyənlər keçirilmiş dərsləri Təhsil Nazirliyinin rəsmi "Youtube" kanalı ilə yanaşı, "Dərs vaxtı"nın "Facebook" səhifəsindən (https://www.facebook.com/dersvaxti.edu.az/), eyni zamanda videodərslər portalından (https://video.edu.az/) izləmək imkanı əldə edə bilərlər.

20/01/2021 09:33

20 Yanvar şəhidlərinin xatirəsinə həsr olunmuş onlayn respublika şahmat turniri təşkil olunacaq. “Təhsil” Respublika İdman Mərkəzinin təşkilatçılığı ilə keçirilən yarışda iştirak üçün Təhsil Nazirliyi sistemində fəaliyyət göstərən uşaq-gənclər idman-şahmat məktəbləri və şahmat klublarından yüz nəfərdən çox şahmatçı qeydiyyatdan keçib. İsveçrə sistemi üzrə 11 turdan ibarət olacaq yarışa 19 yanvar saat 18:00-da start veriləcək. 17 yaşadək (2004-cü il təvəllüdlü və daha kiçik yaşlı) şahmatçılar arasında keçiriləcək turnirin qalibləri müvafiq dərəcəli diplomlarla təltif olunacaqlar. Qeyd edək ki, yarışın keçirilməsində əsas məqsəd 20 Yanvar şəhidlərinin əziz xatirəsinin yad edilməsi, məktəblilərin asudə vaxtlarının səmərəli təşkili, sürətli şahmat (blitz) üzrə qaliblərin müəyyənləşdirilməsi və müasir texnologiyalardan istifadə etməklə şahmatçıların oyun təcrübələrinin  artırılmasından ibarətdir.

19/01/2021 16:00

Ölkənin ən iri milli onlayn platforması olan “Virtual məktəb”in əhatə dairəsi genişlənməkdədir. Belə ki, 10-16 yanvar tarixləri üzrə platformada qeydiyyatdan keçmiş şagirdlərin sayı 1 442 203, müəllimlərin sayı 128 132, aktiv istifadəçi sayı 1 170 528, həftə ərzində platformada keçirilmiş dərslərin sayı  6 278 106 təşkil edib.

19/01/2021 13:59

Təhsil Nazirliyinin dəstəyi və T-Network təhsil işçilərinin təcrübə və kommunikasiya platformasının təşkilatçılığı ilə davam edən “Yeni çağırışlar” onlayn müzakirə proqramının növbəti qonağı Nobel Sülh mükafatı laureatı, professor Məhəmməd Yunusdur. "Yunus Centre"nin tərəfdaşlığı ilə baş tutacaq görüş  26 yanvar saat 18:00-da Təhsil Nazirliyinin rəsmi “Facebook” səhifəsi üzərindən canlı yayımlanacaq. 2006-cı ildə Məhəmməd Yunus və onun yaratdığı Qramen Bankı (Grameen Bank) milyonlarla insanı regiondakı münaqişələrin əsas səbəblərindən biri olan yoxsulluqdan xilas etdiyi üçün Nobel Sülh mükafatına layiq görülüb. Bir vaxtlar yoxsul və maliyyə təhlükəsizliyi olmayan adamlara kreditin təklifi ağlasığmaz ideya kimi görünsə də, Məhəmməd Yunus bunu reallığa çevirib. Professorun mikrokredit ideyası yalnız Banqladeşdə deyil, dünyanın hər yerində milyonlarla adamı yoxsulluqdan qurtarıb. Bir çox tanınmış universitetlərdə çıxış üçün dəvət alan professor təhsil vasitəsi ilə yoxsulluğun aradan qalxacağını deyir və insanların dünyagörüşü, özünə inam, təşəbbüskarlıq bacarıqlarının inkişafı üçün çağırışlar edir, bir çox ölkədən olan insanın təhsil almasını dəstəkləyir. 50-dən çox şirkətin qurucusu olan Məhəmməd Yunus “Wharton” biznes məktəbinin “Son 25 ilin ən nüfuzlu biznes adamları”,“Fortune” jurnalının “Dövrümüzün 12 dahi sahibkarları” siyahısında yer alıb. “AsiaWeek” (Honk Konq) təşkilatı isə onu 20 dahi asiyalıdan biri seçib. Məhəmməd Yunus 2008-ci ildə Böyük Britaniyanın “Prospect” və ABŞ-ın “Foreign Policy” jurnalları tərəfindən keçirilmiş açıq onlayn səsverməyə əsasən, “Top 100 intellektual şəxslər” siyahısında dünyanın ikinci ən intellektual adamı seçilib. Professor Məhəmməd Yunus 20 ölkədən olan universitetdə 55 fəxri dərəcəyə, həmçinin 26 ölkənin 112 mükafatı, 10 ölkənin dövlət mükafatına layiq görülüb. O, ABŞ Prezidentinin Azadlıq medalını və ABŞ Konqresinin qızıl medalını almış yeddi şəxsdən biridir. Məhəmməd Yunus həmçinin Azərbaycan Dövlət İqtisad Universitetinin (UNEC) fəxri doktorudur. UNEC-də onun adını daşıyan Yunus Sosial Biznes Mərkəzi (YSBM) fəaliyyət göstərir. Qeyd edək ki, “Yeni çağırışlar” T-Network koordinatoru Cəfər Mənsiminin təqdimatında ayda iki dəfə yayımlanır. Məqsəd yerli və xarici mütəxəssislərin iştirakı ilə təhsildə yeni çağırışları müzakirə etmək, davamlı öyrənmə və inkişaf prosesini dəstəkləmək, qlobal səviyyədə qabaqcıl təcrübələrlə tanış olmaqdır. Proqramın bundan öncəki qonağı dünyaca məşhur "Khan Academy"nin qurucusu və CEO-su Sal Khan olub. "Yeni çağırışlar” müzakirə proqramı haqqında ətraflı məlumatla T-network-un "Facebook" səhifəsindən  tanış ola bilərsiniz.

19/01/2021 12:30