"Mədəniyyət" və "ARB Günəş" telekanallarında yayımlanan “Dərs vaxtı” proqramının dekabrın 25-i üçün nəzərdə tutulan cədvəlini təqdim edirik. Təhsil Nazirliyi dərs cədvəlinə diqqət etməyi, dərsi “Dərs vaxtı”nda öyrənməyi tövsiyə edir. Əziz şagirdlər, unutmayın ki, teledərslər ən yaxşılardan öyrənmək üçün əlavə və unikal imkandır. Qeyd edək ki, “Dərs vaxtı”na ekran qarşısında baxa bilməyənlər keçirilmiş dərsləri Təhsil Nazirliyinin rəsmi "Youtube" kanalı ilə yanaşı, "Dərs vaxtı"nın "Facebook" səhifəsindən (https://www.facebook.com/dersvaxti.edu.az/), eyni zamanda videodərslər portalından (https://video.edu.az/) izləmək imkanı əldə edə bilərlər.

25/12/2020 08:02

Azərbaycan xalqının Vətən müharibəsində şanlı qələbəsini müxtəlif fənlərdə əks etdirməyə dəstək məqsədilə dərslik müəllifləri "Qələbə dərsləri" adlı könüllü layihəyə qoşulublar. Layihənin icrasında müxtəlif nəşriyyatlar da yaxından iştirak edir. Layihə çərçivəsində hər fənnin məzmununa üzvi şəkildə inikas olunmuş mövzuları müvafiq siniflər üzrə distant dərs zamanı istifadə etmək planlaşdırılır. İlkin olaraq biologiya fənnindən VI, IX, X və XI siniflər üzrə uyğun materiallar tərtib edilib və müəllimlərin istifadəsi üçün Təhsil İnstitutunun Təhsil İşçilərinin Peşəkar İnkişafı Mərkəzinin ( ARTİ TİPİM) rəsmi səhifəsində yerləşdirilib. Digər fənlər üzrə də mövzular hazır olduqca həmin səhifədə paylaşılacaq. Müəllimlərdən bu materiallardan distant dərslərdə fəal istifadə etmək, öz qeydlərini və şagirdlərinin reaksiyaları barədə məlumatı ARTİ TİPİM-ə bildirmək xahiş olunur. Mövzularla qeyd edilən linkə ( http://www.tipii.edu.az/az/article/618-quot-qalaba-darslari-quot-silsilasindan-movzular) daxil olaraq tanış ola bilərsiniz.

24/12/2020 14:59

Peşə Təhsili üzrə Dövlət Agentliyinin təşkilatçılığı ilə "ARB Günəş" telekanalında yayımlanan peşə teledərslərinin 25 dekabr tarixi üçün cədvəlini təqdim edirik. Dərslər saat 18:10-da yayımlanacaq. Qeyd edək ki, teledərsləri Peşə Təhsili üzrə Dövlət Agentliyinin rəsmi "Youtube" (https://bit.ly/2WYaWU9) kanalı ilə yanaşı, "Facebook" (https://bit.ly/34erIjf) səhifəsindən və Təhsil Nazirliyinin videodərslər portalından (https://video.edu.az/) izləmək mümkündür.

24/12/2020 14:21

25 noyabr-22 dekabr tarixlərində keçirilən “Qayıdış” onlayn respublika rəsm müsabiqəsinə yekun vurulub. Təhsil Nazirliyinin dəstəyi, Gənclərin Respublika Bədii Yaradıcılıq Evinin təşkilatçılığı ilə baş tutan müsabiqənin keçirilməsində məqsəd Qarabağı gənclərə daha yaxından tanıtmaq, Vətən uğrunda döyüşlərdə igidlik göstərən qəhrəmanlarımızın döyüş ruhunu, azad olunmuş torpaqlarımızın təbiətini tərənnüm etmək və istedadlı uşaqların bacarıqlarını aşkar etməkdən ibarət olub. Onlayn platformada 3 yaş qrupu üzrə (6-11 yaş, 12-14 yaş, 15-18 yaş) keçirilən müsabiqədə Bakı və Naxçıvan şəhərlərində, eləcə də respublikanın müxtəlif regionlarında fəaliyyət göstərən 42 uşaq-gənclər inkişaf mərkəzlərindən 193 rəsm işi ilə 182 dərnək üzvü iştirak edib. Münsiflər heyəti tərəfindən hər yaş qrupu üzrə istedadlı iştirakçılar qiymətləndirilərək qaliblər müəyyən olunub. Qaliblər Gənclərin Respublika Bədii Yaradıcılıq Evinin diplomları, digər iştirakçılar isə həvəsləndirici diplomlarla təltif olunub.

24/12/2020 10:04

Dekabrın 25-də "Rəqəmsal bacarıqlar" layihəsi çərçivəsində proqramlaşdırma və riyaziyyat üzrə 8-15 yaş arası şagirdlər üçün "Qış onlayn yarışı"na start veriləcək. Yarış yeni il ərəfəsində şagirdlərin asudə vaxtlarını səmərəli və əyləncəli keçirməsi, eyni zamanda onların proqramlaşdırma və riyaziyyat üzrə bacarıqlarının təkmilləşdirilməsi məqsədi daşıyır. Yarışın süjetinə əsasən, iştirakçılar 31 dekabr tarixinədək qarşıdan gələn yeni ili xilas etməlidirlər. Bunun üçün onlara verilən tapşırıqları düzgün yerinə yetirməlidirlər. Yarışda şagirdlər sinif yoldaşları ilə birgə 3-6 nəfərdən ibarət komanda yaradaraq iştirak edə bilərlər. İştirak üçün http://questreg.algoritmika.az/ keçidi vasitəsilə platformadan qeydiyyatdan keçmək lazımdır. Qaliblərə hədiyyələr iki - beynəlxalq və yerli nominasiyalar üzrə təqdim olunacaq. Qeyd edək ki, “Rəqəmsal bacarıqlar” layihəsi 2017-2018-ci tədris ilindən etibarən Təhsil Nazirliyi və "Alqoritmika" beynəlxalq təhsil şirkəti tərəfindən həyata keçirilir. Layihə hazırda Bakı, Sumqayıt, Gəncə, Mingəçevir, Biləsuvar, Şamaxı, Lənkəran, Şirvan, Şəki rayon və şəhərləri üzrə 222 məktəbi, 120 000-dən çox şagirdi əhatə edir.

24/12/2020 09:14

"Mədəniyyət" və "ARB Günəş" telekanallarında yayımlanan “Dərs vaxtı” proqramının dekabrın 24-ü üçün nəzərdə tutulan cədvəlini təqdim edirik. Təhsil Nazirliyi dərs cədvəlinə diqqət etməyi, dərsi “Dərs vaxtı”nda öyrənməyi tövsiyə edir. Əziz şagirdlər, unutmayın ki, teledərslər ən yaxşılardan öyrənmək üçün əlavə və unikal imkandır. Qeyd edək ki, “Dərs vaxtı”na ekran qarşısında baxa bilməyənlər keçirilmiş dərsləri Təhsil Nazirliyinin rəsmi "Youtube" kanalı ilə yanaşı, "Dərs vaxtı"nın "Facebook" səhifəsindən (https://www.facebook.com/dersvaxti.edu.az/), eyni zamanda videodərslər portalından (https://video.edu.az/) izləmək imkanı əldə edə bilərlər.

24/12/2020 08:22

2020-2021-ci tədris ilindən bütün dövlət ümumi təhsil müəssisələrində istifadəyə verilən yeni dərsliklər sırasında I sinif “Azərbaycan dili (tədris dili)” dərsliyi də var. Təhsil İnstitutu tərəfindən dərslik komplektinin hazırlanma prosesində dünyada qəbul olunmuş müasir yanaşmalar, qabaqcıl təhsil sistemlərinin müvafiq kurikulumları və təlimin pedaqoji prinsipləri, habelə şagirdlərdə oxu və yazma savadlılığının müəyyənləşdirilməsi üzrə PIRLS beynəlxalq qiymətləndirmə tədqiqatının çərçivə sənədləri təhlil edilib. Nəticədə dərsliklərin quruluş və məzmunu, təlim metodikası, müasir metodoloji yanaşmalar və digər didaktik prinsiplər ümumiləşdirilərək dərslik konsepsiyası və komplekti hazırlanıb. Sözügedən yeni dərsliyin komponentləri, məzmun standartları və fərqli cəhətləri barədə məlumatlandırıcı videonu təqdim edirik.  

23/12/2020 16:45

 “Koronavirus” (COVID-19) pandemiyası dövründə tədris prosesinin effektivliyinin artırılması məqsədilə peşə təhsili pilləsi üzrə telekanallar, həmçinin müxtəlif platformalar vasitəsilə 200-dən artıq videodərs yayımlanıb.  Videodərslər bir sıra ixtisaslar üzrə təhsil alan tələbələrin nəzəri və praktiki biliklərinin dərinləşdirilməsinə, dərs mövzularına dair qısa izah və təlimatların verilməsinə istiqamətlənib. Bugünədək peşə təhsili istiqamətində tədrisi aparılan əsas baza modulları üzrə 58, praktiki ixtisas dərsləri üzrə 124, nəzəri ixtisas dərsləri üzrə 35 videodərs çəkilib. Hazırlanan videodərsləri Peşə Təhsili üzrə Dövlət Agentliyinin rəsmi “Youtube” (https://bit.ly/2KobUFk) kanalı və Təhsil Nazirliyinin https://video.edu.az/ platforması üzərindən izləmək mümkündür. Qeyd edək ki, bir sıra dərslərin çəkilişində Avropa İttifaqının maliyyə dəstəyi ilə Azərbaycanın peşə təhsili və təlimi sisteminin daha da gücləndirilməsi və müasirləşdirilməsinə istiqamətlənən, BMT-nin İnkişaf Proqramı və Almaniya Beynəlxalq Əməkdaşlıq Cəmiyyəti tərəfindən icra edilmiş layihələrin də qatqısı olub.

23/12/2020 16:20

Təhsil Nazirliyinin "Qarabağın məşhur müəllimləri" layihəsinin növbəti siması həyatını Azərbaycanın ictimai, mədəni və maarif işlərinə sərf etmiş şəxsiyyətlərdən biri, görkəmli pedaqoq və şair Mirzə Xosrov Axundzadədir. 1889-cu il iyul ayının 13-də Şuşada anadan olub. 1906-cı ildən 1913-cü ilə qədər Şuşada "Nəşr-maarif cəmiyyəti", 1913-1917-ci illərdə şəhər məktəbində müəllimlik edib. Azərbaycan Xalq Cümhuriyyəti dövründə məktəblərin milliləşdirilməsinin fəal iştirakçısı olub və anadilli təhsili öz işi ilə təbliğ edib. 1920-ci ildə Şuşada təşkil edilmiş "Nərimaniyyə" və "Haşimiyyə" məktəbləri əhalinin maariflənməsində müstəsna rol oynayıb. Xosrov Axundzadə də bu məktəblərdə çalışırdı. O, 1928-ci ildə dərs demək üçün Xocavənd rayonuna göndərilib. 1932-ci ildə yenidən Şuşaya qayıdan Xosrov Axundzadə müəllimliyini burada davam etdirməklə yanaşı, eyni zamanda savadsızlığın ləğvi hərəkatında fəal iştirak edib. Həmçinin 1935-ci ildən başlayaraq Şuşa şəhər kütləvi kitabxanasının müdiri kimi geniş maarifləndirici iş aparıb. Şuşa şəhər 7 illik məktəbin ibtidai sinif müəllimi Xosrov Axundzadə məktəbə ilk dəfə gəlmiş uşaqların təlimi üzərində böyük əmək sərf edib. 50 illik pedaqoji fəaliyyəti dövründə öyrədə-öyrədə özü də öyrənirdi. Qeyd edək ki, "Qarabağın məşhur müəllimləri" layihəsi çərçivəsində Qarabağda doğulan və pedaqoji fəaliyyətlə məşğul olan tanınmış şəxslər barədə məlumatlar təqdim olunur. Layihənin məqsədi əslən Qarabağdan olan məşhur müəllimləri yad etməkdir.

23/12/2020 14:32

16-22 dekabr tarixlərində Moskva şəhərinin təşkilatçılığı ilə virtual formada V Beynəlxalq Meqapolislər Olimpiadası keçirilib. Dünyanın 31 meqapolisinin iştirak etdiyi və fizika, kimya, riyaziyyat, informatika fənləri üzrə təşkil edilən beynəlxalq olimpiadada məktəblilərimiz uğurla çıxış edərək ümumilikdə 7 medal qazanıb. Belə ki, riyaziyyat fənni üzrə Təhsil Nazirliyinin tabeliyindəki Fizika, riyaziyyat və informatika təmayüllü Respublika liseyinin X sinif şagirdləri Amin Cəfərzadə  və Toğrul Abbasov gümüş medal əldə edib. Fizika fənni üzrə Sumqayıt şəhəri Təbiət elmləri təmayüllü gimnaziyanın XI sinif şagirdləri Sirac Yəhyazadə və Murad Bəşirov, kimya fənni üzrə BDU-nun nəzdində "Gənc İstedadlar" liseyinin X sinif şagirdi Nəriman Şirinli və Türkiyə Dəyanət Vəqfi Bakı Türk liseyinin XI sinif şagirdi  Xanım Yaqublu, informatika fənni üzrə Bakı şəhəri 269 nömrəli tam orta məktəbin XI sinif şagirdi  Amin Cəlilov isə bürünc medala layiq görülüb. Qeyd edək ki, informatika fənni üzrə beynəlxalq olimpiadalara hazırlıq dərsləri “Azercell” Telekom şirkətinin dəstəyi ilə həyata keçirilir. 

23/12/2020 12:01